Գերմանացի Սոֆին, որ իր բազմոցը գտավ իմ տանը

Օգոստոսի վերջին Սոֆին եկավ Հայաստան։ Չգիտեի ինչ ակնկալիքներ ուներ, ինչ փորձ էր ուզում ձեռք բերել ու առհասարակ չգիտեի, թե ով էր նա։ Հետո հասկացա, որ ուզում էր ընկնել իրեն անծանոթ աշխարհ ու կիսվել իր փորձով, լավ հիշողություններ ստեղծել ու դրանցով վերադառնալ հետ՝ Գերմանիա։ Նա մնաց իմ տանը, նրա couch-ն էի ու անձնական խորհրդատու-գիդը։ Հետաքրքիր փորձառություն է couchsurfing-ը: Այն նրանց համար է, ովքեր սիրում են ճանապարհորդել, նոր մշակույթների ու մարդկանց հետ ծանոթանալ, շատ միջոցներ չունեն, բայց ունեն մեծ ցանկություն։

Մի բան շատ կարևոր է ու կուզեմ, որ հաշվի առնես։ Ապրելով ուրիշ մարդու տանը՝ պետք է քեզ հնարավորինս ազատ, բայց և չափավոր պահես։ Շատ լավ կլինի, որ հաշվի նստես տանը արդեն առկա «օրենքների» ու նրա՝ որպես անձ, պահանջ/խնդրանքների հետ։ Շատ ընտանիքներ իրենց հյուրերին խնդրում են, որ տանից իրենց հետ դուրս գան, ինչը, ես չեմ կարող ընդունել։ Հյուրին բանալի չեն տալիս։ Եթե շատ կասկածամիտ ես, կամ չես վստահում անծանոթներին, ապա ավելի լավ է հյուր չընդունես։ Միայն երկկողմանի փոխըմբռնման ու հանդուրժողականության պարագայում ես կարողանալու ապրել մեկի հետ նույն տան մեջ՝ լինի դա անծանոթ հյուր, թե ընտանիքի անդամ։

Շատերն ասում են, որ couchsurfing-ը անապահով է ճանապարհորդելու համար՝ կարող են գողանալ գումարդ, տեխնիկադ կամ ֆիզիկական վնաս հասցնել։ Այդպիսի դեպքեր կարող են լինել ցանկացած ճանապարհորդության ժամանակ, սկզբում կամ վերջում։ Միշտ պետք է լինել զգոն ու չկորցնել ուշիմությունը։ Couchsurfing-ը եզակի հնարավորություն է տալիս անընդհատ հաղորդակցվելու այն լեզվով, որը ուսումնասիրում ես, կամ ուզում ես սովորել։ Տանը, խանութում ու նոր ծանոթների հետ խոսելիս կարող ես կիրառել գիտելիքներդ ու մեծացնել բառապաշարդ։ Շատերը նույնիսկ պատրաստ են օրվա մեջ ինչ-որ ժամանակ տրամադրել քեզ նոր բաներ սովորեցնելու ու օգնելու համար։ Իսկ եթե հենց դու ես հյուրընկալողը, ապա քեզ համար քո ճանապարհորդող հյուրը կլինի հաղորդակցման թիրախը, եթե գիտի այն լեզուն, որ երկար ժամանակ չես կիրառել, կամ եթե կուզենայիր լեզուդ միշտ ակտիվ պահել։ Նա էլ քեզ իր մշակույթի հետ կծանոթացնի։ Եթե երկար ժամանակով է եկել, կարելի է նույնիսկ լեզվի ակումբ բացել ու բոլոր հետաքրքրվածներին հրավիրել, հանդիպումներ կազմակերպել ու բավականին լավ ժամանակ անցկացնել՝ օգնելով նաև մյուսներին։ Իսկ քո հյուրն էլ հնարավորություն կստանա ծանոթանալու տեղի մարդկանց հետ, ի վերջո, ապրում է մի վայրում, որտեղ մարդիկ իրենից տարբերվում են  լեզվով, մտածելակերպով ու ապրելակերպով։

Կարդա նաև այս հոդվածները՝
4 պատճառ գերմաներեն սովորելու համար
Ինչպե՞ս սկսել գերմաներեն սովորել
Որքա՞ն արժե օտար լեզու սովորելը