Բարև։ Մտածե՞լ ես այն մասին, թե ինչ կապ կարող է լինել քո բնավորության ու արվեստի այն ճյուղի մեջ, որով պիտի զբաղվես։ Ես որոշեցի ինքս ինձ համար գտնել պատասխանն ու կիսվել քեզ հետ էլ։
Շատ սոցիալական հարցումներ և հետազոտություններ ցույց են տալիս, որ բժշության, բիզնեսի կամ ցանկացած այլ ոլորտում հայտնի և կայացած մասնագետների մի ստվար զանգված ունի արվեստի հետ կապված հոբբի։ Արվեստը կարող է օգնել քեզ բացահայտել քո թաքնված ներուժը։ Շատ մարդկանց համար արվեստը հակասթրեսային միջոց է։ Որոշների համար շփման և սոցիումի հետ հարաբերվելու հնարավորություն։ Եթե դու որոնում ես քեզ համար նոր և հետաքրիր զբաղմունք, որը հնարավորություն կտա նորովի նայել քեզ շրջապատող աշխարհին և ինքդ քեզ՝ քո ներաշխարհին, արվեստը ճիշտ ընտրություն է։
Հա, չմոռանամ ասել, եթե հետաքրքրված ես արվեստով, միացիր մեր ֆեյսբուքի խմբին՝ Arts and Crafts Learners Club-ին։
Հիմա ինչպե՞ս ընտրել
Վերջին մի քանի տարիների ընթացքում մի շարք համալսարաններ և գիտնականներ փորձել են պատասխանել հարցին՝ արդյո՞ք մարդու բնավորությունից կախված է նրա՝ արվեստի այս կամ այն ճյուղի նախընտրությունը։ Հստակ բանաձև չկա։ Կան որոշակի բաժանումներ և նույնիսկ թեստեր, որոնց միջոցով կարելի է ստուգել՝ արվեստի որ ճյուղն է հնարավորինս մոտ քո հոգեբանական կերպարին, բայց նման մոտեցումը առանձնապես վստահելի չէ։ Նման թեստի միջոցով կարող է պարզվել, որ քեզ համապատասխանում է բալետը, բայց դու զուրկ լինես երաժշտական լսողությունից, կամ ռիթմի զգացողությունից։ Սոցիոլոգները իրենց հերթին ավելի որոշակի են՝ ասելով, որ էքտրավերտները ավելի նախընտրում են խմբակային, աշխույժ և ակտիվ արվեստը՝ դերասանություն, պար և այլն։ Ինտրովերտները նախընտրում են ավելի անհատական զբաղմունքներ՝ նկարչություն, երաժշտություն։ Բայց այս բաժանումն էլ հստակ և վերջնական չէ։ Անձնական փորձը իրականում որոշում կայացնելու ամենահեշտ և հստակ ուղին է։
Իսկ եթե նախընտրություն չկա՞
Արվեստի ճյուղ ընտրելիս հիմնվում են որոշակի անձնական նախընտրության վրա։ Դու սիրում ես նկարել, ընտրում ես նկարչության խմբակ։ Բայց հարց է ծագում՝ ի՞նչ ընտրել, եթե դու երբևիցե չես զբաղվել արվեստով և չունես նախընտրություն։ Աշխույժ և ակտիվ զբաղմունք սիրող մարդկանց կգերեն պարերը, բայց և մյուս կողմից նրանք հաճույք կարող են ստանալ և՛ խեցեգործությունից, որը հնարավորություն կտա ցրվելու։ Ավելի պասիվ և հանգիստ մարդիկ կարող են զբաղվել նկարչությամբ։ Միշտ վերլուծություններով զբաղվող մարդկանց կարող է հետաքրքրել ասեղնագործությունը։ Բայց այս ամենը նույնպես հստակ և որոշակի չէ. դու կարող ես գնալ նկարչական խմբակ և բացահայտել քեզ համար կավագործությունը, իսկ պասիվ և հանգիստ սիրող մարդը կարող է իրեն գտնել պարերի մեջ։Արվեստը կարող է ինքնահաղթահարման լավ միջոց հանդիսանալ։ Եթե դու պասիվ ես՝ մարտահրավեր նետիր ինքդ քեզ և գնա պարերի, դա կօգնի քեզ հաղթահարել ներքին լարվածությունը, որը առաջանում է նոր և մարդաշատ միջավայրում։ Եթե դու ակտիվ և աշխույժ մարդ ես և քեզ դժվար է հանգիստ նստել՝ գնա խեցեգործության կամ կավագործության։ Դա կօգնի քեզ զսպել պոռթկումները, քանի որ կավը քո ձեռքի տակ շատ ճկուն է։
Արվեստում շատ բաներ որոշվում են անձնական փորձառությամբ, և եթե դու չունես արտահայտիչ տաղանդ այս կամ այն արվեստի ճյուղում, մի հուսահատվիր, փորձիր ուժերդ մեկ այլ ճյուղում։ Իր բազմազանության մեջ՝ արվեստը հնարավորություն կտա բոլոր ցանկացողներին գտնելու իրենց համար ինքնարտահայտման միջոց։
Leave a Comment