Կրթության նոր ձևաչափ – Բիզնեսի առցանց աշխարհն այս շաբաթ 13.04.20 – 19.04.20

Այս շրջանում շատ է խոսվում համավարակի պատճառով առաջացած տնտեսակական ճգնաժամի մասին։ Որոշ կանխատեսումների համաձայն առաջիկա տարիներին շատ մասնագիտություններ կկորցնեն իրենց ակտուալությունը, կփոխարինվեն առավել օպտիմալ ծրագրային լուծումներով, և արդյունքում աշխատաշուկան մեր ներկայիս պատկերացումներից շատ կտարբերվի։ Մյուս կողմից, ինքնամեկուսացման ընթացքում հեռավար աշխատանքի անցնելու տենդենցը շատ ոլորտների համար կարող է համավարակից հետո էլ շարունակական բնույթ կրել ՝չէ որ գործատուի համար բազում հաստատուն ծախսեր կրճատվում են աշխատանքի կազմակերպման այսպիսի ֆորմատում։ Այս երկու միտումները հաշվի առնելով ՝ խորհուրդ եմ տալիս ինքնամեկուսացման մնացած ժամանակը ապարդյուն չվատնել և փորձել մի նոր մասնագիտություն ձեռք բերել կամ գոնե ՝ հիմնային գիտելիքներ մի նոր ոլորտում։

Ստեղծված իրավիճակում այս նպատակի իրագործման համար առավել հարմար տարբերակ է առցանց կրթությունը ՝ անվճար վեբինարների, դասընթացների, հանդիպումների ու քննարկումների միջոցով։ Գրեթե բոլոր կրթական կենտրոնները, բիզնես թրեյնինգներ առաջարկող ընկերություններն ու ոչ միայն, այս շաբաթ առաջարկում են անվճար վեբինարների ու դասընթացների լայն ընտրություն, իսկ մյուսներն էլ չափազանց շահավետ զեղչեր ամենապահանջված դասընթացների համար։ Կարճ ասած ՝  թե ժամանակային առումով, թե ֆինանսապես ամենահարմար պահն է ինքնակրթվելու։

Չեմ դադարում հիանալ բիզնես համայնքի այս աստիճան համախմբվելու ունակությամբ։ Այս շաբաթ բոլոր հնարավոր թեմաներով անվճար վեբինարների ու դասընթացների իսկական տեղատարափ է ՝ պրակտիկ գիտելիքների դասընթացներից մինչև տնտեսական ճգնաժամը հաղթահարելու վերաբերյալ քննարկումներ։ Ոլորտի առաջատարներն կիսվում են իրենց փորձով։ Այսպիսի հնարավորությունը չի կարելի բաց թողնել։