Ինչպե՞ս կողմնորոշվել իսպաներենի դասընթաց ընտրելիս

Օտար լեզու դասավանդելու բազմաթիվ մեթոդներ կան եւ շատ դժվար է ասել, թե որն է ավելի արդյունավետ։ Կրկին հակված եմ այն մտքին, որ յուրաքանչյուրի հետ պետք է հատուկ մեթոդ մշակել ու կիրառել։ Մեկի համար առավել արդյունավետ կարող է լինել ավանդական Քերականական թարգմանության մեթոդը ( The Grammer Translation Method), որը հիմնված  է գրավոր թարգմանության և ընթերցանության վրա, մյուսի համար Աուդիո – լեզվական մեթոդը (Audio-lingual method), մեթոդի էությունը անընդհատ  լսելն ու կրկնելն է օտար լեզվով ձայնագրությունը (լեզվի ուսուցման մեթոդների մասին առավել ամբողջական կխոսեմ հետագա հոտվածներցս մեկում)։ Բացի կիրառվող մեթոդից, կարեւոր է նաեւ, որ ուսուցիչն ունենա անհատական մոտեցում յուրաքանչյուր աշակերտի հանդեպ։ Բանն այն է, որ  ցանկացած մարդ սովորելու յուրահատուկ մեխանիզմ ունի։ Ըստ այդ մեխանիզմների՝ սովորողները բաժանվում են չորս խմբի՝ մեկը հեշտ է յուրացնում նյութը կարդալով (visual learners), մյուսը՝ լսելով (aural learners), մեկ այլ խումբ նախընտրում է յուրացնել նյութը գրելով (reading/writing learners) եւ վերջինները՝ ինչ-որ գործողություն անելով, օրինակ՝ ձեռքի շարժումեր անելով, քայլելով, ինչ-որ առարկաներ շոշափելով, եւ այլն (kinesthetic learners)։

Շատ կարեւոր է, երբ ուսուցիչը կարողանում է հասկանալ իր աշակերտի տիպը եւ կիրառել հենց այդ աշակերտին հարմար ուսուցման մեթոդ, որի արդյունքում ուսուցումն ավելի արդյունավետ է լինում։ Կան ուսուցիչներ, որոնք շատ լավ կարողանում են համադրել տարբեր մեթոդներ եւ հարմարվել աշակերտի առանձնահատկություններին։ Եթե դու երբեւէ օտար լեզու չես սովորել, քեզ համար դժվար կլինի հասկանալ, թե որ մեթոդն է քեզ համար արդյունավետ։ Դա կհասկանաս ընթացքում, բայց նախնական պատկերացում կազմելու համար կարող ես զրուցել ուսուցչի հետ եւ հասկանալ՝ իր մեթոդը հարմար է քեզ, թե ոչ։ Փորձիր պարզել նաեւ արդյոք ուսուցիչն օգտագործում է հավելյալ նյութեր՝ տեսանյութեր, ֆլիմեր, երգեր, խաղեր դասը ավելի հետաքրքիր դարձնելու համար։