PASCH դպրո՞ց, չեմ լսել

«Թող շփվի գերմանացիների հետ, իմանա դիսցիպլինան ինչ բան է»։ Մանկությունիցս մնացած արտահայտություններից է, որ մեր ընտանիքի ընկերներից մեկը ասաց, երբ իմացավ, որ գնալու եմ գերմանական թեքումով դպրոց։ Այն մեր տնից բավականին հեռու էր, իսկ այդ տարիներին տրանսպորտը մեղմ ասած լավ չէր աշխատում։ Բայց որպեսզի չսովորեմ տնակում, մերոնք ինձ ուղարկեցին այդ դպրոց։ Տարիներ անցան ու միայն այդ ժամանակ հասկացանք, որ այդ քարաշեն դպրոցը ոչ միայն տաք է, այլև այնտեղ ապահովում են բարձրորակ կրթություն։ Մի խոսքով իմ պատմությունը սկսվել է տնակում սովորել չուզելու ձգտումից։
Իսկ այժմ գանք մեր ժամնակներ ու չմոռանամ հստակեցնել թե ինչ է PASCH-ը։ Հապավումը բացվում է այսպես՝ Schulen:Partner der Zukunft (Դպրոցներ՝ ապագայի գործընկերներ)։

Բազմիցս արդեն նշել եմ թե ինչ հնարավորություններ է օտար լեզուն բացում մեր առաջ։ Հայաստանում մեծ պահանջարկ ունեն անգլերենը, ֆրանսերենը, գերմաներենը, իսպաներենը, ռուսերենն ու չինարենը։ Պատճառները տարբեր են։ Շատերն ասում են միայն անգլերեն իմանամ հերիք է, բայց օրինակ Գերմանիայում սովորելու համար հաճախ գերմաներենի գոնե տարրական գիտելիքները պարտադիր են, էլ չասեմ, որ ապրելու համար էլ առօրյա կյանքում կբախվեք խնդիրների, եթե չիմանաք գերմաներեն։ Հայաստանում կան մի քանի  PASCH դպրոցներ։ Այսինքն այդ տարիների ընթացքում դպրոցը համալրվում է համապատասխան տեխնիկայով, գույքով ու ուսման համար անհրաժեշտ նյութերով։ Կազմակերպվում են բազմաթիվ միջոցառումներ ու որ երևի թե ամենակարևորն է՝ երեխաներին տալիս են հնարավորություն գնալ գերմանախոս երկիր ու զարգացնել իրենց լեզվական հմտությունները, տեսնել նոր մշակույթ, ձևավորել այլ աշխարհընկալում, ունենալ նոր պատկերացումներ ու ձգտումներ։