Սովորում ենք տեսնելու յուրահատուկ ձևեր

Ինչո՞վ են տարբերվում խմբային դասերը անհատականից։ Խմբային դասերի դժվարությունը հետևյալն է․ յուրաքանչյուր երեխա գալիս է մեկ այլ միջավայրից, իսկ առօրյան հոգսաշատ է՝ չհաշված մեր հոգսերը։ Դասը սկսելուց առաջ մոռանում ենք ամեն խնդրի մասին՝ կենտրոնանալով ներկա պահի գեղեցկության վրա ֆիզիկական վարժության և հանգստացնող երաժշտության միջոցով։ Այդպես զարգանում է երեխայի կենտրոնացումը։ Խմբային դասերի դժվարություններից է նաև, որ յուրաքանչյուր երեխա պետք է ներգրաված լինի դասին՝ հաշվի առնելով երեխայի հատուկ կարիքները։ Նա առանց վախենալու պետք է արտահայտի իր կարծքը, որը կարող է  չհամընկնել ընկերների կարծիքին, իսկ տարբերվող և յուրահատուկ լինելը միայն խրախուսվում է։ Միևնույն ժամանակ նրանք սովորում են հարգել դիմացինի կարծիքը՝ առանց ծաղրելու այն։ Կարծիք արտահայտում են նաև այն երեխաները, ովքեր խոսքի հետ կապված խնդիրներ ունեն, բայց դա պետք է նրանց չընկճի միջավայրում։  Անհատական արվեստի ուսուցումը համեմատած ավելի հեշտ է, իր դժվարություններով հանդերձ։ Սակայն մեր նախագծի  նպատակը հաղորդակցման հմտություններն զարգացնելն է։

Ես մանկավարժական կրթություն չունեմ, բայց ինձ օգնում է ստեղծարար մտածողությունը և երեխաների սովորելու պատրաստակամությունը։ Ես նրանց հետ խոսում եմ  գիտելիքի հյուրասիրության մասին։ Օրինակ՝ եթե քեզ խնձոր են հյուրասիրում և դու չես ցանկանում ուտել այն, պետք է ոչ թե ստիպեն քեզ կամ համոզեն, որ ուտես այլ բացատրեն, թե դա որքան օգտակար է, որքան վիտամիններ է պարունակում։ Այդպես էլ գիտելիքն է, պետք է ոչ թե ստիպես, որ սովորեն այլ բացատրես, թե դա որքան կարևոր է իրենց համար և որ նրանք ունեն ընտրության հնարավորություն։