Նպատակասլաց գերմանախոսը

Ուսումնական տարին մոտենում էր ավարտին, երբ հայտնի դարձավ, որ մոտ ժամանակներս սպասվում է փոխանակային ծրագիր մեզ հետ համագործակցող դպրոցի հետ։ Անչափ ուրախ էի և մոտիվացված, քանի որ կարող էր կատարվել երազանքս՝ կհայտնվեի Գերմանիայում։ Ամեն ինչ շատ հանկարծակի եղավ 2019 թվականի հունիսի 12-ին հավակնորդների ծնողներին կանչեցին դպրոց՝ համաձայնություն ստանալու նպատակով, իսկ արդեն հաջորդ օրը՝ 13-ին, տեղի ունեցավ հարցազրույց–քննությունը։ Բոլորս լարված սպասում էինք և առաջինը հենց ինձ ներս կանչեցին։ Առաջին հարցը որ տվեցին հետևյալն էր, թե ինչու պետք է հենց ես մասնակցեմ այս ծրագրին։ Սկսեցի պատմել գերմաներենի, Գերմանիայի և իմ միջև եղած կապից) Հնչեցին ևս մի քանի հարցեր ընտանիքիս և իմ կյանքի մասին և վերջ. դուրս եկա։ Մոտ 3 ժամ սպասեցինք մինչև բոլորը դուրս եկան, նրանք որոշում կայացրին և մեզ բոլորիս ներս կանչեցին։ Սկսեցին կարդալ Գերմանիա մեկնողների  անունները, 7 աշակերտ՝ 2 տղա, 5 աղջիկ։ Ցուցակում երկրորդը իմ անունն էր։ Անունս լսելուց հետո այնքան էի ուրախացել, որ հաջորդներինը չլսեցի, և գաղափար չունեի էլ ովքեր են մյուսները, սակայն հետագայում շատ լավ ընկերներ դարձանք։ Գերմանիա այցը տեղի ունեցավ սեպտեմբերի 7-14-ը։ Եղանք Բեռլինում, Մագդեբուրգում, Աշերսլեբենում և Հալլեում։ Ապրում էինք հյուրընկալող ընտանիքներում։ Ձեռք բերեցինք հրաշալի ընկերներ, որոնք մոտակա ժամանակներս գալու են Հայաստան։ Այդ 7 օրերը ինձ համար դարձան անմոռանալի, երկար ժամանակ լեզու սովորելուց հետո գիտելիքները հենց այդ երկրում կիրառելը հաճելի զգացում է։  Գերմաներեն սովորելու պատահական առաջացած որոշումը փոխեց իմ կյանքը։ Ինքնակրթության շնորհիվ դարձա ավելի պատասխանատու և նպատակասլաց։ Վերջիվերջո հասկացա,որ եթե գիտակցում ես, թե ինչ ես ուզում և չես հանձնվում, ապա անպայման հասնում ես ուզածիդ․․․

Վահե Գաբրիելյան